Wednesday, December 08, 2010

التنازل الأول و الأخير


لا تتنازل .. ف دائماَ ما كان التنازل الأول هو مصدر كل الشرور .. فالتنازل الأول يجلب المزيد من التنازلات

منذ بدأ الخلق و التنازلات هى الخطيئه البشريه الأبديه و مدخل الشيطان الرئيسى .. أول تنازل كان لأدم أبو البشر حين أكل من الشجره المحرمه رغم ما تمتع به من نعم الجنه و تحذير الله له من عدم الأكل منها .. و كان جزائه ان طرد من الجنه نتيجه لهذا التنازل البسيط - أكل من شجره - !! ا

دائما ما كان التنازل الأول هو مدخل الشيطان و فى الموروث الثقافى دائماَ ما ترددت العباره الخالده
(أول مره هى أصعب مره و بعد كده هتتعودى) على لسان أحدى العاهرات المخضرمات ناصحهَ بها احدى الفتيات المستجدات .. انه التنازل الأول

فى علم النفس هناك ما يعرف بالحاجز النفسى للخطيئه و كسر الحاجز النفسى للمخطئ هو اهم خطوه يحدثها التنازل الأول .. بعد ذلك يكون القيام بالخطأ شئ سهل و معتاد

الناس فى مصر زمان كانوا معروفين بالشهامه و الأصاله و التدين و حب الخير و الترابط الأسرى و هو ده كان دايما خط دفاعهم ضد التنازل حتى الفقرا و البسطاء كان دايما عندهم ايمان و رضا بحالهم وكان فيه قناعه بأن
(محدش فى مصر بيبات من غير عشا) كان فيه ترابط اجتماعى و تدين و أخلاق أما دلوقتى بقى كل حاجه بتتباع وتشترى .. عشان الناس اتعودت على التنازل

الدين .. بقى فى شيوخ فضائيات بيبيعوا فتاوى و صكوك غفران و تعصب اعمى و بقى كله تدين ظاهرى - حجاب من فوق و أستريتش من تحت - مظهر متدين و سلوك منحرف

الفن .. بقى مبتذل و مشوّه على طريقه السبكى و اهو اى حاجه بتجيب فلوس/ سبوبه
ا
السياسه .. مع ظهور القوادين - يوجد تعبير شعبى أكثر دقه لا داعى لذكره - بالصحافه و المنتفعين على الساحه السياسيه و ظهور النواب اللصوص و الجهله و المصفقين بمجلس الشعب المصدر الرئيسى لأصدار القوانين والتشريعات ومراقبه الأداء الحكومى اصبح العبث هو المسيطر على الموقف و اختلطت المعاير واصبح اللصوص و الخونه فى الصداره يتحدثون عن الشفافيه و النزاهه و العمل من اجل مستقبل الوطن و اختفى الشرفاء و المهتمين بالإصلاح و إتهموا بالعماله وإثاره البلبله و تكدير الصفو العام !! ا

كل هذا حدث نتيجه لسلسله من التنازلات .. تنازلات دينيه و اخلاقيه من العلماء و الشيوخ .. تنازلات فنيه من الفنانين .. تنازلات شعبيه من المواطنين فى حقوقهم و واجباتهم .. الكل تنازل على طريقه
(خليك فى حالك و كل عيش) و دلوقتى البلد بتنهار و قريبا مش هيلاقوا العيش اللى اتنازلوا عشان ياكلوه
و بمناسبه التنازل .. اسمع الأغنيه دى .. معبّره جداَ

1 comment:

real estate egypt said...

كلام من ذهب
الى الامام