"المعلّقين "كفاااااايه .. حراااااام

ليك فى الكوره ؟

يبقى أكيد إتعذبت بالمعلّقين قبل كده

أنا فعلاَ مش عارف مين السادى المسؤول عن إختيار المعلّقين .. فعلاَ سادى
مش معقوله يبقى بلد فيه 70 مليون مواطن كروى ( نقاد - محللين – مدربيين وحكام .. فى بعض الأحيان) ومفيهوش غير (3-4) معلّقين هما اللى بيعرفوا يتكلموا .. يتكلموا مش يعلّقوا

فعلاَ .. من غير أى مبالغه (3-4) بالكتير هما اللى ممكن تسمعهم أو يبقى ليهم لازمه وانت بتتفرج على الماتش ( ميمى الشربينى طارق الأدور – أشرف شاكر ) .. الباقى كلهم .. أنا بعرف أعلق أحسن منهم ..

فى منهم ناس كانوا بيعلّقوا زمان كويس بس دلوقتى عندهم شيخوخه .. بقوا بيهييسوا مش بيعلّقوا .. وعلى رأسهم شيخ المهييسين


محمود بكر

الراجل ده آخر ماتش أفتكر انى سمعتوا بيعلّق فيه كويس كان (مصر و هولندا .. أيطاليا 90 ) دلوقتى بقى بيهزى .. فعلاَ بيهزى .. سلسله من الكلام الغير مفهوم أو القدييييم طحن

"شيكل المباراه "
"المباراه باين عليها معقربه .. بلغه الكوره"
"الواد اللى بيضوحر مع الكوره"

لأ وياسلام لو ربنا كرمك وسمعته وهو بيذيع ماتش دولى أو فيه لعيبه عالميين .. ياااااااااااه .. صباح اللغه .. مافيش أسم واحد يوحّد ربنا صح رغم أنهم لاعيبه مشهوره و أى عيل صغيرعارف أساميهم

لأ وساعات كمان – زياده فى التكديير – ممكن يقول الأسم الأول لللاعب ، بدل الأسم اللى مشهور بيه يعنى مثلاَ :

ايتو يبقى --> صمويل و بيرقّص صمويل .. وبيشوط صمويل .. وياسلام عليك يا صمويل

لأ ولو لعبه عجبته .. بيفتكرلك ناس .. أبوك شخصياَ مايوعاش عليهم

يبقى زيدان مثلاَ بيرقص .. يقولك " وخدوا واحده كده من بتوع سمير قطب " .. مين سمير قطب ده يا عم ؟
أو روبيرتو كارلوس بيشوط .. يقولك " والله بيفكرنا بأبو حباجه وتوتو والناس بتاعت زمان دى "

واحد تانى من اللى كانوا بيعلّقوا كويس زمان .. بس السن بقى

حماده إمام

دلوقتى .. أى كوره .. انشالله يكونوا لسه بيسنتروا .. تبقى " خطراااااااااااااه " و " حلوااااااااااااااااه " و" مين يقابل " و " يااااااااااااااااااااااااااااااااه " و " الله الله الله على الحاجات اللى بتعجب الجماهير " .. طول الماتش .. لغايه ما يجيلك هيستريا .. والماتش لسه صفر- صفر

ولو بيعلّق على ماتش فى الأسماعيليه أو بورسعيد وقاعد وسط الجمهور .. ياااه .. تلاقى واحد من الجمهور يقوله " والله يا كابتن حماده انت وشك حلو علينا .. بس الحكم أبن ال(...) اللى ما هيورد على جنه ده هو اللى مبوّظ الماتش " و واحد تانى يسأله فى وسط الماتش "يرضيك كده يا كابتن حماده .. اللعيب المكسّح ابن ال(...) اللى مش عارف يشوط الكوره ده" .. يقوم الكابتن حماده يشكر الراجل اللى كان بيشتم من شويه .. ويشكر الحكم ابن ال(...) اللى كان بيتشتم ويطلب من المسئولين – زى كل مرّه - .. يعملوا كابينه للمعلّقين .. عشان ماينفعش اللى بيحصل ده ..

وفيه ناس تانيه طول الماتش عماله تخرف وفاكره ان ده أبداع

مجدى عبد الغنى

كارثه مجدى عبد الغنى ده فى التعليق .. فعلاَ تحس انه شارب حشيش قبل الماتش .. كل ماتش لازم يقولك إنه بيعرف برتغالى عشان كان محترف هناك .. وان مش عارف أيه .. يعنى "ازيّك" بالبرتغالى .. وايه .. يعنى "إتمسوا بالخير" .. و .. خلاص ياعم احنا فى حصه لغه ؟
وأى ضربه جزاء تيجى .. بتفكّره بضربه الجزاء اللى جابها فى كاس العالم .. ويا ترى اللاعب هيحطها زيه .. ولا هيطلعها بره
مره كان فيه ماتش البرازيل وتركيا فى كاس العالم 2002 و رونالدو جاب جون .. قالك " ياسلالالالام .. حطها كأنه طاير فى حمام سباحه"

اللواء مدحت شلبى

"وينهار ابيض .. ينهار ابيد .. ينهار ابيد"
"يا سلام عليك .. يا سلام عليك يا واد يا مجرم "
"وهالله هالله هالله .. هالله هالله هالله هالله هالله هالله"
" ويلعب كوره .. مش منضبطه"

حطها والنبى .. والنبى .. والنبى .. والنبى حطها ياراجل .. حرام عليك .. حرام عليك .. مش عارف لواء أيه ده ؟

وكل ماتش لازم يتكلم عن الناس اللى احسنوا استقبالنا .. وكرم الضيافه .. والأخوه العرب .. يا عم .. المااااااااتش

فيه لواء تانى – هما كتروا كده ليه ؟ - بس ده بيعلّق قهر

اللواء عصام صيام : تعليقه يجيب مغص .. صوته وحش .. وبينام نص الماتش ومفيش معلومات عن اى حاجه .. تحس انه مضايق منك وهو بيعلّق .. حاجه اخر الملل

فيه بقى المعلّقين اللى هما بيجيبوهم من على القهوه لما "يتزنقوا فيهم" لما يكون فيه ماتش على قد حاله .. دورى .. كاس .. حاجه محلّى كده

محمد حسام الدين .. "رئيس لجنه الحكام السابق" أحسن واحد .. مبيحبش يتدخّل فى قرارات الحكام .. والحكم صاحب القرار الأول والأخير .. والحكم هو الميقاتى الوحيد فى المباراه .. والحكم

سيد الثعلبى .. بتاع " ياسلام عليك .. تسلم رجليك " ومرّه لما حسام حسن جاب جون قاله: " تسلم صلعتك يا كابتن"ب

فوزى سكوتى .. حاجه كده بتعلّق .. أى كائن حى فى كوكب الأرض ممكن يعلّق أحسن منه

ده غير المعلقين العرب .. اللى طول الماتش بيصوتوا .. طول الماتش .. فاكرين ان هو ده الأحتراف

وعلى رأى محمد سعد فى فيلم" اللى بالى بالك" : ياتوفّروا لهم الكلّه .. ياتجيبوا لهم سندوشتات حلاوه بالقشطه

ربنا يهدى الجميع .. ويصبرنا على مابلانا