ثقافة الجوجوجوجوجوووو

أنتشرت فى الأونه الأخيره بعض الأغانى الشعبيه – شعبيه أوى .. اللى هى أغانى شعبان عبد الرحيم بالنسبه لها سيمفونيات شديده الرقى – وهى عاده ما تستخدم فى الأفراح الشعبيه وتكون مصاحبه بكميات مهوله من الحشيش و البيره .. لزوم التذوق الفنى

وعلى الرغم من دناءه و إسفاف المستوى الفنى لتلك الأغانى .. إلا اننى لاحظت إنجذابى الى بعض الجمل اللحنيه فى تلك الأغانى .. يمكن عشان جديده أو كوميديه و الكلمات كمان ساعات بتبقى مسخره .. مش عارف ليه حاسس أن فيها بعض الأبداع على الرغم من إنحطاط مستواها الفنى

إبداع ناتج عن قاعدة حشيش فنيه عاليه الجوده – دى إصطفه الحشيش مش القاعده – بس فى الأول و الأخر إبداع

لاحظ الأبداع فى جملة " جوجوجوجوجووو جوجوجوجوجووو .. يابا يابا يابا " أو " عينى ليل للليل لليليلى .. روحى لول لللول للولولو " أو " كوكا كوكا كوكا .. كوكا كوكا كوكا " وأخيرا .. رائعه المبدع عبد الباسط حموده " أنا مش عارفنى .. أنا توتت/توهت منى" ولاحظ هنا أن كلمه "توهت" بينطقها "توتت" دليل على شده التوهان !! ا

زى ما فيه ناس بتتذوق ال "هيفى ميتال" يمكن تتذوق هذا الكم من الجوجوجوجوجووو و العينى ليل لليليل ليليلي .. وتصل للعالميه و ربك بيرزق .. على الأقل أحسن و أرقى من افلام السبكى !! ا

ملحوظه

أنا فعلا بستظرف بعض الأغانى دى .. ساعات بتطلب تهييس .. مش هقدر أحط اللينكات بتاعتها عشان ده يعتبر افساد للذوق العام .. بس اللى عايز يقوللى (; ا

.

العيد فرحه ;)

0900

أنا مش عارف مين إبن الحرام اللى أخترع موضوع ال 0900 ده ؟

ده واحد إبن لذينه مش هيورد على جنه .. شيطان .. أستغل الضعف و الغباء البشرى فى أنه ينصب على الناس .. إتصل وهنعملك كل حاجه

ا

إتصل و هتكسب .. إتصل وهتكسب جوائز رهيبه عشان أنت العبيط الوحيد اللى عرف حل السؤال العبيط .. أو معرفش .. أو كانت الأسئله صعبه وجرب حظك المره الجايه .. أو حتى محدش سألك خالص المهم أنك تتصل وهتكسب .. عشان أنت زى الفل ونيتك صافيه وكل الناس بتقولك إتصل وهتكسب .. مش معقوله البنات اللى زى القمر دول يكونوا بيكذبوا عليك و ريكو و عماد بعرور .. عايز ايه أكتر من كده ؟

إتصل وقول رأيك .. اللى هو فظيع .. وطبعاَ مش عارفين من غيرك كنا عملنا أيه ؟ .. وانت عشان بتفهم فى كل حاجه سياسه وكوره وفتوى وفن فهتتصل عشان الناس اللى كانوا هيضيعوا من غيرك دول .. أو تتصل عشان تصوت للناس اللى محتاجين لصوتك .. حونين أوى بروح خالتك

إتصل وقول توقعاتك .. لماتش النهارده .. عشان انت أبن جنيّه مكشوف عنك الحجاب .. وأنشاء الله هنكسب (5-2) يخرب بيت الدقه يا أخى

إتصل بالخط النفسى .. باقه من أحسن علماء "علم النفس" جايبنهم من على القهوه .. هيحللوا شخصيتك ويقولولك أنت أيه اللى تعبك وهيظبطوك آخر تظبيط .. آآآآه وأتصل "بسماح أنور" من الساعه 1 للساعه 2 بعد نصف الليل وقولها على مشاكلك وهى هتحلهالك .. سماح أنور ؟!! لييييه لاسمح الله ؟ يعنى انا أحكى لسماح انور على مشاكلى بصفاتها أيه ؟ حراااااا م .. مش كده ابداَ

إتصل بالخط الجنسى .. بجملة بقى .. هيقولولك على مشاكلك الجنسيه ويعالجولك البروستاتا و يخلوك عنتر زمانك وهتخلّف فى أخر المكالمه .. تفهم ايه انت فى الجنس يا حمار ؟

إتصل وقول على تاريخ ميلادك وتاريخ ميلاد اللى بتحبه أو أسم أمك وأسم أم اللى بتحبه وأحنا نقولك هتتجوزوا ولا لأ .. يا أخى (---) أصل هى كانت واقفه على موضوع الأبراج ده .. كل حاجه محلوله .. الشقه و الشبكه و المهر .. أهم حاجه التوافق الفلكى .. ربنا يستر بقى

إتصل بالخط الدينى .. ونزل كل الأدعيه .. و خد الفتوى اللى تريحك .. عندنا شيوخ زى الفل .. وعندنا صكوك غفران .. و هنشفعلك يوم القيامه .. أعوذ بالله من غضب الله .. ده فيه أعلان بيقولك " أتصل وماتخليش ولا حسنه تفوتك " فيه اكتر من كده إسفاف ؟

أخر حاجه بقى .. البوب الكبير .. "ممدوح فرج" .. خط التخسيس .. أعلان أبن كلب مسخره " عايز تبقى زى الأبطال دول ؟ .. أتصل بيا .. أماكن كتير فى جسمك بقى شكلها غريب؟ .. أنسى .. عندك ترهل وسمنه و الكرش مضيقاك؟ .. برضه انسى .. رياضه .. لياقه .. قوه .. وهنرجعلك عضلاتك ونشفط الدهون .. ونرقصك باليه .. بس أنت إتصل " كل ده هيعملوا فى التليفون .. المشكله ان ممدوح فرج تخين وجسمه وحش أساساَ .. طيب كان ظبط نفسه الأول .. حاجه مسخره والله .. الله يخرب بيت اللى كان السبب

: (

لابد أن تقف أولاَ على قدميك لكى تقاتل .. لا أحد يقاتل جالسا

...

مبسوط :)

ظبطت نفسى متلبسا بالأنبساط - على غير العاده - يمكن عشان رمضان .. يمكن عشان قربت أخلص المدعوق .. مش عارف .. المهم انى مبسوط أوى وحابب شكل الناس والتراويح والزحمه و الألوان .. المصريين دول جمال أوى وهم مبسوطين ورايقين ومش شايليين هم بيبقوا طيبين قوى وحابين بعض واخلاقهم كويسه .. الله يجازى اللى دايقهم وفقرهم وشّيلهم الهم .. ربنا يصلح حالنا وحال المسلمين جميعا ويديم علينا نعمه الأنبساط

ملحوظه عبيطه - متركزش معاها كتير

ا" الأنبساط اعمق و أجمل من السعاده لغوياَ " متسئلش ليه

Head Rest ..

Just relax

...

يارب .. اللى تشوفه

حينما كان يلقي بجبهته علي الأرض ساجداً كان يدعو( يارب رحمتك) ثم صار يدعو (يارب الصبر) .. ثم (يارب الرضا) وأخيراً عندما صار لا شئ يصلح ، صار يدعو (يارب ... اللي تشوفه) !! ا

منقول "مدونه - من الأول" ا

Waiting ..

ا

ومابين كده أو كده .. مش مرتاح أنا .. خلينى بقى كده .. يمكن الهنا مدّارى فى صبرى عليك

Find 5 differences !!

مش داعيه

مش عاهره

هى الناس جرا لها ايه ؟ 1

لا إله إلا أنت سبحانك إنى كنت من الظالمين

ال70 مليون محجوب عبد الدايم

آاااااه يا بلد ال70 مليون "محجوب عبد الدايم" !! ا

;)

أزاى ساكت على روحى ده كله ؟

معقول أنا قضّيت العمر ده كله زى ما رحت زى ما جيت ؟

معقول أنا عمرى ما فكرت ولا أتغيرت ولا حبيت ؟

وأزاى ساكت على روحى ده كله ؟ وليه أستنيت ؟

أغنية "المرايه" وجيه عزيز

تحذير أمنى

لأنك مواطن معارض ســـــــئيل

وعامل مفتح ودمك تقيــــــــــل

ونايم بتنفخ و قايم بتنفــــــــــخ

تحسبن وتصرخ و نازل عـويل

وحاقد وجاحد مـنفسـن وبيئــــه

وفاكر حكومتك مصحه وسـبيل

وعايش في نعمه و ناكر لخيرنا

فمعني اعتراضك ده نكران جميل

وبتقول حقوقي .. جتك كسر حُقك

حقوقك فنيتو و حظــك قــلـــيل

ومن أجل ذلك حقولك حقيقتك

وسرك معايا و عندي الدليــــــل

بأنك أساسا مواطن عويــــــــل

ومانتش مواطن مـأصّل أصيـل

ولاقيين جنابك علي باب حارتنا

ومن غير كفولة و مانتاش كـميل

موصل بفيشه و ملفوف بخيشـه

واسمك نفيشه مهوش اسماعيل

وأمك مسافره...وأبوك بالمعافره

لقي له ف جهنم وظيفة و كفيــــل

وغامقة نهايتك يا فالح و ســـــودا

وأخرتها تهمه بانك عميـــــــــــــل

وجاي لجنابك يقفــــــــــل حسـابك

سيادة المقدم معــــــــاه عزرائيــل

فودع عيــــالك و أهلك ومــــــالك

لأنك مسافر ... وسفرك طويــــــل

تحذير أمنى " إيمان بكرى " ا

فوبيا .. فوات الأوان

واحداَ من أسؤ كوابيسى .. أن تأتى الأشياء بعد فوات الأوان .. ا

انها اللحظه التى يستيقظ فيها الأرنب ليجد أن السلحفاة قد أصبحت على مشارف خط النهاية فى قصة "الأرنب و السلحفاة" الشهيرة .. لن يكسب السباق رغم أنه الأسرع .. لقد أستيقظ .. بعد فوات الأوان !! ا

أن يصبح بمقدورك شراء اللعبه التى طالما تمنيت اللعب بها وأنت صغير ولكن الأن لم يعد لديك رغبة فى اللعب !! ا

أن تظهر براءتك فى الجريمة المنسوبه إليك .. بعد مرور 10 أعوام من دخولك السجن .. كفاره !! ا

ا

أن تتمكن من الزواج عندما يصبح عندك 40 سنه !! ا

أن تتمكن من الأنجاب عندما تصبح غير قادر على تربية الأبناء !! ا

أن يتم تكريمك على أعمالك العظيمه .. فى ذكرى وفاتك !! ا

المشكلة هنا فى أنك تكون خاسراَ فى جميع الأحوال .. ا

ا

فى البدايه تكون خاسراَ لأنك " لم تستطيع " شراء اللعبه – اثبات براءتك – الزواج مبكراَ ..ا

ا
ومع مرور الوقت تكون قد فقدت الرغبة "نفسيا َ" أو القدرة "بدنياَ"َ على الأستفاده / الأستمتاع .. ا

ا

المشكله الأكبر فى أنك قد حصلت على ما تريد فعلآَ

اللعبه – البراءه – الزواج – الأنجاب – التكريم .. ولكن بعد فوات الأوان .. أى أنك لن تحصل حتى على شرف الحرمان من تلك الأشياء !! ا

ويبقى الوضع على ما هو عليه : )

جريح القلب والكرامه .. أهيم على وجهى ككلب بلا مأوى .. حراره الجو تبخر لذة المشى .. المقهى منقذ من ضجر الوحدة .. أجلس وأطلب القهوة وأرهف السمع .. أسمع وأهنأ بشئ من العزاء .. أنتم إذا شئت حزب وهمى لاشعار له إلا الرفض .. إن أضجرك الكلام فمد البصر الى الطريق .. راقب حركة الذاهبين والجائين .. حركة سريعه لا تتوقف ولا تنقطع .. وجوه مكفهرة ماذا وراءها ؟ الرجال والنساء والأطفال , حتى الحبالى لا يقرن فى بيوتهن .. كل يحمل مأساته أو مهزلته .. حوانيت الأثاث والبوتيكات مكتظة .. كم أمه تعيش جنباَ إلى جنب فى هذه الأمه ؟ أضواء الميدان قوية مثيرة للأعصاب , ومثيرة للأعصاب أيضاَ قوارير المياه المعدنية على موائد السياح .. ماذا نشرب نحن ؟! وأغرب الأغانى تنطلق من التاكسيات فى راديو المجاذيب .. لا يبقى على حاله التى كان عليها إلا الشجر والعمائر .. وتدوى خطبة من الراديو فى مكان ما فتنشر الأكاذيب فى الجو مع الغبار .. تعب .. تعب .. فلنعد الى الكلام .. خرابة صغيرة بمائة ألف .. الجرائم الأكاديمية فى الجامعة .. كم عدد اصحاب الملايين ؟ الأقارب والأصهار والطفيليون .. المهربون والقوادون والشيعة والسنة .. حكايات ولا ألف ليلة .. الجرسون عنده أيضاَ حكاية وعند ماسح الأحذية .. متى تبدأ المجاعة ؟ الرشوة عينى عينك بأعلى صوت .. الأستيلاء على الأراضى .. شيخ العصابة له أوراد .. والفتنة الطائفية من يوقظها ؟ مجلس الشعب كان مكان للرقص فأصبح مكان للغناء .. الأستيراد بدون تحويل عملة .. أنواع الجبن .. البنوك الجديدة بكم البيض اليوم ؟ والنقود فى ملاهى الهرم .. وفسخ الخطبة ! ماذا قال إمام الجامع على مسمع من جنود الأمن المركزى ؟ لا مرحاض عام فى الحى كله .. لم لا نؤجرها مفروشه ؟ ما هو إلا ممثل فاشل .. وضرب المفاعل العراقى ؟ صديقى بيجن .. صديقى كيسنجر .. الزى زى هتلر والفعل شارلى شابلن .. ويسود صمت شامل ريثما تذهب امرأة قادمة من الطريق إلى بيت دعارة وراء المقهى وتعقد مقارنة بين تضخم عجيزتها والتضخم المالى العام .. متفائل يؤكد أنها تشتغل لتجمع رسوم رسالة الدكتوراه وأن قلبها انقى من الذهب .. شاب شاذ يقترح الشذوذ كحل لآزمة الحب فى الطبقة ذات الدخل الثابت وأيضاَ لتحقيق الهدف من تنظيم الأسرة .. لاخلاص إلا بالخلاص من كامب ديفيد .. العودة إلى العرب والحرب .. حرب أبدية والويل لعملاء التطبيع .. كفى .. كفى .. فى الوقت متسع لقليل من التسكع !! ا

رواية " يوم قتل الزعيم " 1985- لنجيب محفوظ

تأملات ..

أجمل منظر ممكن تشوفه على الصبح منظر أطفال صغيرين رايحين المدرسه لوحدهم وهم مبسوطين .. قد ايه شكلهم جميل ويدعوا للتفاؤل والأحساس بالأمان .. ا

24 years ..

العضمه كبرت .. هيييييييييييه دنيا !! ا

Santa in Egypt !!