.jpg)
شئ سخيف جداّ إنك تكون ثائر وسلبى أو ثائر وغير قادر على التغيير أو ثائر ومفيش فأيدك حاجه تعملها .. تفضل تتكلم .. وتنفعل .. وتحزق .. وتحرق فى دمّك .. لغايه ما الناس تزهق منك و انت تزهق من نفسك ومن كتر الشكوى .. وبرضه مفيش حاجه بتتغير
وتقعد تفكر لغايه لما تتجنن .. هو أنا اللى صح والناس غلط ؟ .. ولا يمكن الناس مبتحسّش .. لأ مش معقول .. أكيد انت اللى مزودها شويتين .. طيب نجرب تانى .. لأ أهى .. هى اللى بايظه .. بايظه طحن
يا ابنى استغفر ربنا .. دى وساوس شيطان .. هو عايز يكفرك
إستغفر الله العظيم يا رب .. بس الأستغفار مالوش دعوه بالموضوع .. يعنى استغفر ربنا وأصبر عشان ده إبتلاء ؟ .. و ربنا يفرجها من عنده .. طيب ماهى دى سلبيه .. " إن الله لا يغيّر ما بقوم حتى يغيروا ما بأنفسهم " ا
طيب ما انت معملتش حاجه بأيجابيتك
مهو مفيش فأيدى حاجه أعملها
أصبر
مهو الصبر ده مش حاجه بتتعمل .. ده حاجه مبتتعملش
مهو الصبر ده مش حاجه بتتعمل .. ده حاجه مبتتعملش
طيب فكّر فى حاجه تانيه تعملها
والله فكرت .. مافيش حاجه بتتغير كتير .. بتلف تلف وترجعلك .. أصل دى حياتك .. الأساس فيه خلل .. العطل فى الموتور يا حضرت !! ممكن تتناساه .. تكببر .. بس مش هتحل حاجه .. يبقى الوضع على ما هو عليه وعلى المتضرر انه يتنيل على عينه
يادى النيله .. خلاص روح إنتحر
والله فكرت فيها .. بس حرام .. كمان مش جايبه همها .. كلب وراح .. ولا الهوا .. الكلاب على قفا من يشيل .. لازم مصيبه تحصل عشان الناس تبتدى تحس
آآآآآه ده فكر إرهابى انتحارى شيوعى إخوانى
يا عم إرهابى مين .. حتى الأرهاب مبقاش يجيب همه .. هيقولوا "معتوه – مختل عقلياَ قتل مجموعه من الأبرياء" و البرئ من دول يعمله 3000 جنيه .. يعنى الليله كاها هتصفصف على كلام فارغ وهتطلع فى الأخر معتوه – مختل عقلياَ .. وبرضه انت اللى غلطان
روح يا ابنى ربنا يبتليك بمصيبه مؤثره عشان الناس تبتدى تحس وبكده يبقى ربنا حلها من عنده وانت شاركت بشكل إيجابى (مبتلى بالمصيبه) والوضع إتغير !! ا
6 comments:
و الله ما عارف اقولك ايه
جايز لان الواحد حاسس بكل اللي قلته
:)
تحياتي
ههههههههههه
ما تقلقش يا ايهاب فى يوم هتبقى زى فؤاد المهندس " سبعاوى " فى فيلم عائلة زيزى و تقول المكنة جابت قماش
:)
مش عارفه عموما الحماس طبيعى انه له دورة زى الموجه شوية فى القمة و شويه فى القاع و لازم تلمس الأرض علشان تبدا تطلع من جديد
لا تقلق
و ده جزء من الحوار اللى بيدور بينى و بين نفسى
نفس الشعور ك(
شعور بالعجز التام وان اخرك شوية كلام وخلاص
طب بتعمل ايه
متعرفش !!
يارب يقدرنا على عمل حاجة ليهم
أنا عايز أعلق على الصورة..معبرة جدا..أوقات أحلامنا بتبقى أكبر من امكانياتنا..أوقات بنبقى عايزين نطير ومش عارفين..عايزين نتغير ومش عارفين..
كلنا فى أوقات بنبقى زى الدبدوب اللى مالوش كفين عشان يعزف..
بأحييك يا إيهاب
مش عارفه احنا فعلا سلبين ولا مفيش فى ادينا حاجه نعملها
بس متهيالى ممكن نعمل
ممكن نبدا بنفسنا ونغير اللى شيفينه غلط ودى مش حاجه تافهه والله دى حاجه مهمه ومع الوقت متهيالى هيبقى فى نتيجه
نتكلم ونكتب وليه لاء مش يمكن الكلام عن السلبيات واقتراح حلول مثلا يوصل صوتنا فى يوم وحاجه تتغير
نفكر واكيد هنلاقى طريقه
Post a Comment