Friday, November 30, 2007

عشان انت مصرى


عشان انت مصرى

عشان انت مصرى لازم تعانى
وتفقد كرامتك بكل المعانى
وتحرق فى دمك سنين مش ثوانى
واوعى تصدق كلام الاغانى
بتاع الحضاره وكانى ومانى
ده كله هجايص مايدخل ودانى

عشان انت مصرى العذاب بيناديك
بتبدا فى يومك حاجات بترازيك
فى نومك فى قومك تعكنن عليك
تضايقك ولسه العماص فى عينيك
مافيش ميه تشطف صابونه فى ايديك
وجسمك ملزق وريحتك عاديك
فتلبس وتنزل وفيك اللى فيك

ورايح لشغلك حتحتاج مواصله
ادى المترو واقف وكهربته فاصله
وفى الميكروباص خناقه وحاصله
اوتوبيس فرامله عايزالها وصله
وتوك توك ده تايه ومحتاج لبوصله

بتوصل لشغلك بدم اتحرق
فى زحمه وكتمه وحر وعرق
رئيسك سايبلك كومه ورق
ده غير دمغه ضايعه وملف اتسرق
وفى كام مواطن عامللك قلق
بيشكى تقول له روح اندعق
وعركه وهوجه وشاى اندلق
ومخك خلاص من الصداع اتفلق

هترجع لبيتك ده لو كان فى بيت
هتوصل هتندم ياريتك ماجيت
مراتك بتصرخ خلاص استويت
عيالك بتطلب وهات كيت وكيت
تزعق تهاتى ياناس اتهريت
ولاحد سامعك مهما هاتيت

عشان انت مصرى وده للاسف
فلازم تآسى تعيش تتقرف
وكل الاساسى فى حياتك ترف
فتنسى الكرامه وتنسى الشرف
وتسرق وتنصب او تنحرف
ودمعك بيجرى وجرحك نزف
مش انت اللى مصرى؟؟؟ .. جتك القرف
أحمد فؤاد نجم

5 comments:

Camellia Hussein said...

لو سألتك انت مصري تقوللي اييييييييييييييييه؟؟؟

Abd-Alrahman said...

القصيدة دي جامدة جدا
بجد بتلمس الواقع المهبب
الي اي مصري عايش فية
شكرا قلبت علينا المواجع

micheal said...

كلما مر الوقت كلما زاد الفاجومي ابداعا
تحياتي و كل سنه و أنت طيب

Anonymous said...

very nice man
بالفعل منطبق على احوال شعب مصري
اخرجوا من هذة البلد على الفور تعالوا الى الولايات المتحدة تجدون حياة بكرامة
مصري مقيم بامريكا

Anonymous said...

اكيد الواقع صعب بس مش للدرجه دي
لازم نحاول نغير كل ده
وخلينا نبص للنص المليان