Saturday, March 31, 2007

عن التع-تيييت أتحدث



معذره إذا كان الموضوع يحتوى على بعض الألفاظ الخارجه .. بس هيه بقت كده .. ملهاش اسم تانى ..ا

أعتقد أن %90 من مشكلات الشعب المصرى نتيجه لثقافه التع-تيييت والتى أدّت الى تدهور جميع المجالات الثقافيه والسياسيه و الأجتماعيه .. إلخ

والتع-تيييت كسلوك قد أصبح عاده عند الشعب المصرى وأستشرى بشكل رهيب حتى أصبح هو الأساس فى معظم التصرفات ..ا


وإليك بعض الأمثله ..ا (By default) بقى معر- تيييت


التعليم ..ا


الطلبه تغش عن جهل شديد ورغبه غريبه - بأماره أيه ؟ - فى النجاح والتفوق !!ا
أما المدرسين فهم يقوموا بمساعده الطلبه أو" التع-تيييت " من باب ( يلا خلّى العيال تنجح ) أو ( ياعينى الواد أهله صارفين عليه دم قلبهم ) ا... ا
الغريب بقى أن حتى الوزير بيشارك فى الحكايه دى .. مصر هى البلد الوحيده اللى الوزير لازم يوعد الناس أن " الأمتحان جاى فى مستوى الطالب المتخلّف " وأن " الأسئله كلها جايه من الكتاب المدرسى ودليل التقويم " ولو حد حاول يحط سؤال فيه شبهه تفكير .. العيال تعيّط والأهالى تشتكى والوزير يتدخل ويلغى السؤال .. " يعنى أيه يلغى سؤال عشان صعب ؟!! .. مهو لازم يكون فيه أسئله صعبه !! .. ايه العيب فى كده ؟ ..االعيب أن المجموع %103 ده أسمه تهريج .. هبل " ا

والنتيجه جيل من الجهله حاملى الشهادات وأصحاب المجاميع الفلكيه .. والعيال تفرح والأهالى تفرح
والوزير يفرح " وزغرطى يللى مانتيش غرمانه " !!ا

المرور ..ا

رخصتك يافندم .. حضرتك سايق على 190 .. مش رابط الحزام .. ومفييم العربيه و .. ا
إنت عارف إنت بتكلم مين يا حيوان ؟؟ .. أنا ابن اللواء (...) ا
لا مؤاخذه .. أتفضل يا فندم .. اسف على الأزعاج
عالم بهايم .. أنا عارف بيجيبوكم منين ؟
ده فى حاله لو أن نمره العربيه مش باين عليها أنها بتاعت واحد مهم .. ودى مابتقفش أساساَ أو عربيه غاليه - ماركه - مابتقفش برضه عشان صاحبها أكيد واصل ..ا

الواسطه .. ا

الواسطه هى صوره حيّه من صور التع-تيييت الذى تشهده بلدنا بكثافه .. أى حاجه بقت بالواسطه ..ا
دخول المدارس بالواسطه
تخليص الورق فى المصالح الحكوميه بالواسطه أو بالرشاوى ( صوره أخرى من صور التع-تيييت ) ا
تطليع رخصه بالواسطه
الخروج من الجيش أو التظبيط فيه بالواسطه
الشغل بالواسطه
التمثيل والغناء بالواسطه .. أو المواهب " مش لازم تكون مواهب فى التمثيل والغناء " ا
حتى السفر بره البلد بالواسطه .. " يعنى كمان مش هتعرف تسيبها !! " ا


فى نوع تانى من التع-تيييت .. " التع-تيييت الميرى" .. ا

وده بتلاقيه فى الشرطه و الجيش .. بيبقى بأوامر .. عملاَ بسياسه " عبد المأمور " أو عملا بسياسه " أربط نفسك جنب الحمار .. مكان مايعوز صاحبه " !! ا

أخرحاجه بقى وصلها الشعب المصرى فى التع-تيييت .. ا

.. (Self Ta3-teeet) اأنه بقى يع-تيييت على نفسه

ارتضى المهانه .. فى أقسام الشرطه و المصالح الحكوميه والمظاهرات
ارتضى التزوير .. وباع صوته فى الأنتخابات " بقى يطلع بأى مصلحه .. هى كده كده خربانه " ا
ارتضى السرقه .. ركّب وصله دشّ - زوغ فى المترو/ الكمسرى - سرقه خطوط التليفون - سرقه الكهرباء ...ا
ارتضى العرى و الأباحيه .. هى الناس مبتشوفش بناتهم لابسين ايه ؟ ولا بيلبسوهم كده عشان يتجوزوا ؟ طيب مابيشوفهمش بيعملوا ايه فى المصايف .. العجمى .. مارينا .. وشواطئ مارينا .. ودلع مارينا .. ورقصنى يا جدع .. واهى ماشيه .. ا
" وأبقى تعالى باليل وأنا اوريك الويل " ا


حتى الأمثال .. بقى فيه موروث من الأمثال الشعبيه بتدعوا للتع-تيييت ..
ا

عك .. وربّك يفك
طرّيها .. الناس لبعضيها
دماغى و( ... ) .. وحمد الله على سلامتى
عك ولييس .. كله كويس
كببر
نففض
سقّع دماغك
أشترى دماغك


على فكره سياسه التع-تيييت جزء من عبقريه الشعب المصرى .. نوع من أنواع التكيّف السلبى مع الواقع المؤلم .. بس للأسف أدّت لنتائج مدمره .. ربنا يتولانا برحمته .. آمييين

Thursday, March 29, 2007

Thursday, March 15, 2007

هييييييييه .. دنيا

مهندس ..... ظابط ..... سقا !! ا

أنا كنت شئ وصبحت شئ ثم شئ
شوف ربنا .. قادر على كل شئ
هز الشجر شواشيه ووشوشنى قال:ا
لابد ما يموت شئ عشان يحيى شئ
!! عجبى

Monday, March 12, 2007

حديث الصباح والمساء



أن يحاول الأمل التسلل إلى قلبى و إدخال السعاده عليه
فشكراَ للأمل على جهوده المضنيه .. وعلى إهتمامه ..ا

أن يقوم حظى العاثر بأجهاض محاولات الأمل و أن يقف حائلا بينى وبين السعاده
فهذا هو القدر .. و الحمد لله على كل شئ ..ا

مازلت أحاول الأبتسام والرضا
ولكن الرضا شعور داخلى لا يمكن إصطناعه ولا التدريب عليه
من الممكن التدريب على الصبر .. الصبر السلبى
لكن الرضا من عند الله ..ا
اللهم ارزقنا الصبر والرضا والسعاده
وأرحم ضعفنا وقلّه حيلتنا .. ا
آميييييين

Thursday, March 01, 2007

ولو كان يرضيك تفضل كده قدامى .. خلاص خلّيك



براءة الضابط وحبس أمين الشرطة
سنة مع الشغل
كتب محمد سعد
قضت محكمة جنح أمبابة ببرائة ضابط الشرطة كريم عبدالله من قسم امبابة وامرت بحبس أمين الشرطة أحمد عبدالفتاح سنة مع الشغل والنفاذ في قضية كليب القفا والمتهمين فيها باستعمال القسوة مع ايهاب مجدي فاروق داخل حجز القسم وتصويره اثناء صفعه علي 'القفا'.صدر الحكم برئاسة خالد محجوب رئيس المحكمة بحضور وائل حسين وكريم اشرف رئيس النيابة بامانة سر نصر الدين
محمد ومحمد صبحي
كان المتهم قد فشل في التعرف علي ضابط الشرطة في طابور العرض الذي تم في قاعة المحكمة في حين تعرف علي أمين الشرطة