Thursday, October 23, 2008

0900



أنا مش عارف مين إبن الحرام اللى أخترع موضوع ال 0900 ده ؟
ده واحد إبن لذينه مش هيورد على جنه .. شيطان .. أستغل الضعف و الغباء البشرى فى أنه ينصب على الناس .. إتصل وهنعملك كل حاجه
ا
إتصل و هتكسب .. إتصل وهتكسب جوائز رهيبه عشان أنت العبيط الوحيد اللى عرف حل السؤال العبيط .. أو معرفش .. أو كانت الأسئله صعبه وجرب حظك المره الجايه .. أو حتى محدش سألك خالص المهم أنك تتصل وهتكسب .. عشان أنت زى الفل ونيتك صافيه وكل الناس بتقولك إتصل وهتكسب .. مش معقوله البنات اللى زى القمر دول يكونوا بيكذبوا عليك و ريكو و عماد بعرور .. عايز ايه أكتر من كده ؟

إتصل وقول رأيك .. اللى هو فظيع .. وطبعاَ مش عارفين من غيرك كنا عملنا أيه ؟ .. وانت عشان بتفهم فى كل حاجه سياسه وكوره وفتوى وفن فهتتصل عشان الناس اللى كانوا هيضيعوا من غيرك دول .. أو تتصل عشان تصوت للناس اللى محتاجين لصوتك .. حونين أوى بروح خالتك

إتصل وقول توقعاتك .. لماتش النهارده .. عشان انت أبن جنيّه مكشوف عنك الحجاب .. وأنشاء الله هنكسب (5-2) يخرب بيت الدقه يا أخى

إتصل بالخط النفسى .. باقه من أحسن علماء "علم النفس" جايبنهم من على القهوه .. هيحللوا شخصيتك ويقولولك أنت أيه اللى تعبك وهيظبطوك آخر تظبيط .. آآآآه وأتصل "بسماح أنور" من الساعه 1 للساعه 2 بعد نصف الليل وقولها على مشاكلك وهى هتحلهالك .. سماح أنور ؟!! لييييه لاسمح الله ؟ يعنى انا أحكى لسماح انور على مشاكلى بصفاتها أيه ؟ حراااااا م .. مش كده ابداَ

إتصل بالخط الجنسى .. بجملة بقى .. هيقولولك على مشاكلك الجنسيه ويعالجولك البروستاتا و يخلوك عنتر زمانك وهتخلّف فى أخر المكالمه .. تفهم ايه انت فى الجنس يا حمار ؟

إتصل وقول على تاريخ ميلادك وتاريخ ميلاد اللى بتحبه أو أسم أمك وأسم أم اللى بتحبه وأحنا نقولك هتتجوزوا ولا لأ .. يا أخى (---) أصل هى كانت واقفه على موضوع الأبراج ده .. كل حاجه محلوله .. الشقه و الشبكه و المهر .. أهم حاجه التوافق الفلكى ..
ربنا يستر بقى

إتصل بالخط الدينى .. ونزل كل الأدعيه .. و خد الفتوى اللى تريحك .. عندنا شيوخ زى الفل .. وعندنا صكوك غفران .. و هنشفعلك يوم القيامه .. أعوذ بالله من غضب الله .. ده فيه أعلان بيقولك " أتصل وماتخليش ولا حسنه تفوتك " فيه اكتر من كده إسفاف ؟

أخر حاجه بقى .. البوب الكبير .. "ممدوح فرج" .. خط التخسيس .. أعلان أبن كلب مسخره " عايز تبقى زى الأبطال دول ؟ .. أتصل بيا .. أماكن كتير فى جسمك بقى شكلها غريب؟ .. أنسى .. عندك ترهل وسمنه و الكرش مضيقاك؟ .. برضه انسى .. رياضه .. لياقه .. قوه .. وهنرجعلك عضلاتك ونشفط الدهون .. ونرقصك باليه .. بس أنت إتصل " كل ده هيعملوا فى التليفون .. المشكله ان ممدوح فرج تخين وجسمه وحش أساساَ .. طيب كان ظبط نفسه الأول .. حاجه مسخره والله .. الله يخرب بيت اللى كان السبب

4 comments:

خمسة فضفضة said...

السلام عليكم ورحمة الله وبركاته

ههههه

والله عندك حق ، ومش عارفه ازاي الناس دي بتنساق كده ورا كلمتين هبل في اعلان اهبل فيه شوية بنات مابيعملوش حاجه الا انهم يرقصوا وبس ؟؟؟

الحمد الله الذي عافانا مما ابتلي به كثيرا من خلقه

سلام

the girl in the mirror said...

سلام عليكم
انفاسى تتقطع انبهارا بالمدونة ككل و هحاول اعلق على كل التدوينات لأن كلها عجبتنى بجد بس المشكلة الشح المزمن اللى بعانى منه فى الوقت :)
عن البوست ده بأه حبيت اسلوبك اوى و السخرية فيه مناسبة جدا للموضوع..
ربنا يتوب علينا من الوش ده و من الاغبيا اللى بيمشوا وراه

ihapoof said...

فضفضه

الحمد لله .. أبتلاء فعلاَ




the girl in the Mirror

أنفاسى تتقطع أنبهاراََ :)

ربنا يجبر بخاطرك يا ستى , تشرفى فى أى وقت , البلوج بلوجك

سعيد بمعرفتك

أُكتب بالرصاص said...

انت فاكر العفريت اللي طلع لأسماعيل باسين في الفانوس السحري


دا يبقا
ابو ممدوح فرج

دي ملحوزة كدا على ما قسم

ممدوح فرج دا غتيت قوي

كمان اعلانت زيرو تسماية
هابلة قوي
بس دايما اقول
فيه ناس هابلة لسه بتتصل