Tuesday, December 09, 2008

ثقافة الجوجوجوجوجوووو


أنتشرت فى الأونه الأخيره بعض الأغانى الشعبيه – شعبيه أوى .. اللى هى أغانى شعبان عبد الرحيم بالنسبه لها سيمفونيات شديده الرقى – وهى عاده ما تستخدم فى الأفراح الشعبيه وتكون مصاحبه بكميات مهوله من الحشيش و البيره .. لزوم التذوق الفنى

وعلى الرغم من دناءه و إسفاف المستوى الفنى لتلك الأغانى .. إلا اننى لاحظت إنجذابى الى بعض الجمل اللحنيه فى تلك الأغانى .. يمكن عشان جديده أو كوميديه و الكلمات كمان ساعات بتبقى مسخره .. مش عارف ليه حاسس أن فيها بعض الأبداع على الرغم من إنحطاط مستواها الفنى

إبداع ناتج عن قاعدة حشيش فنيه عاليه الجوده – دى إصطفه الحشيش مش القاعده – بس فى الأول و الأخر إبداع

لاحظ الأبداع فى جملة " جوجوجوجوجووو جوجوجوجوجووو .. يابا يابا يابا " أو " عينى ليل للليل لليليلى .. روحى لول لللول للولولو " أو " كوكا كوكا كوكا .. كوكا كوكا كوكا "
وأخيرا .. رائعه المبدع عبد الباسط حموده " أنا مش عارفنى .. أنا توتت/توهت منى" ولاحظ هنا أن كلمه "توهت" بينطقها "توتت" دليل على شده التوهان !! ا

زى ما فيه ناس بتتذوق ال "هيفى ميتال" يمكن تتذوق هذا الكم من الجوجوجوجوجووو و العينى ليل لليليل ليليلي .. وتصل للعالميه و ربك بيرزق .. على الأقل أحسن و أرقى من افلام السبكى !! ا


ملحوظه
أنا فعلا بستظرف بعض الأغانى دى .. ساعات بتطلب تهييس .. مش هقدر أحط اللينكات بتاعتها عشان ده يعتبر افساد للذوق العام .. بس اللى عايز يقوللى (; ا
.

6 comments:

new life said...

هى بقيت ثقافه كمان
يلا خليهم ياكلوا عيش

Anonymous said...

....هاهاهاه
بقى اللى عايز يقولك، لا متخافش يا سيدى اللى عايز هيعرف يتصرف لوحده لان مثلا اغنية عبد الباسط دى كانت واخده المركز الاول فى عدد مرات التحميل فى كام موقع كده
بس انت فكرتنى لما لقطت اغنية ليليليلي فىالعربيات اللى ماشيه جنبى و كنت هاموت و اعرف الاغنيه اسمها ايه و حتى مش عارفه اعمل جوجل لان مفيش غير ليليليلي "كنت عامله زى الخواجه بيجو و الجواب بتاعه كده و المشكله فضلت مأرقانى جدا لدرجة انى قررتاسأل بتاع العصير اللى حنب المستشفى على الاغنيه لحد ما اصحابى اتطوعوا و قرروا تتبع الاغنيه هما كمان بحثا عن اى مقطع و الحمدلله جبناها من ،انا جسمى كله موجع ،
كلام بجد بقى الاغانى دى اولا جديده جدددا خاصة الاغنيه اللى بتتخيل حوار العبد و الشيطان بجد فكرتها فعلا متميزه..ثانيا الناس اللى بتغنى عندهم اصوات مختلفه و فيها نوع من القوه و الشجن كده ساعات الدليل ان الاغنيه ساعات بتبدى بموال من غير الات ...اما الجمل اللحنيه اللى المفروض انها مسفه و بلا معنى فهى شدتناس كتير على مختلف ثقافاتهم يبقى اكيد فيها حاجه

Ganna Adel said...

ام حاجة انك محطيتش لينكات عشان الواحد لو شيطانه وزه و حب يسمع الكلام الفارغ ده متبقاش الدنيا سهلة و يبقى قدامه فترة بحث مناسبة يراجع فيها نفسه و يعقل :)
بس بينى و بينك بتطلبها احيانا بصراحة

"إبداع ناتج عن قاعدة حشيش فنيه عاليه الجوده"..عجبتنى الجملة :)

basma saghir said...

في حضرتك كمان رائعة الفنانة خالدة الذكر هدى اللي هي: زكي يا زكي

بس كان لازم تحط اللينكات على فكرة..حتى من باب العلم بالشئ مش اكتر لأني فعلا بحب زكي يا زكي لما بتطلب تهييس :):)

saso said...

واي ابداع
علي قد مابتتفرض عليك بس ساعات من باب الخنقة بتقرر بدل ماتهرب منها تتامل ف كلامها
والغريب انها ساعات بتبقي حلوة

حتي المزيكا الفقيرة اللي غالبا بتبقي تنويعات كيبورد بدل الالات التانية بتلاقيها مناسبة اوي
اغنية فقيرة بتتغني لفقرا. لازم تبقي كده

شيمـــــاء said...

مش عارفة ليه دايما الاغانى الشعبية بتعجبك
ما تعقل يا ابنى