معملتش دماغ- ناس قبل كده ؟
ايه دماغ- ناس دى
دماغ ناس" .. زى دماغ قهوه .. دماغ حشيش .. تعمل دماغ ناس"
بص ياسيدى
لو فى يوم لقيت نفسك متضايق ومخنوق وملكش نفس تكلّم حد ومش لاقى حاجه تعملها .. إنزل الشارع إتمشى لواحدك و تأمّل فى الناس
هتلاقى الموضوع مسلّى جداَ
الشعب المصرى ده لذيذ طحن .. دماااااااااااااااااغ
هتلاقى ناس طالع عين أهلهم فى أتوبيس فيه 186 واحد والناس طالعين من الشبابيك والجو حر .. والناس لسّه بتركب وهى مبتسمه وحاسه بالكفاح .. وتلاقى واحده ست تخينه – غالباَ موظفه – دخلت وسط ال 120 واحد اللى واقفين على الباب و أخترقت الجموع فى براعه ورشاقه تحسد عليها
بنت لابسه هدوم المدرسه ومزوغه ماشيه مع ولد – ممكن تحلف إنه مش هيلاقى شغل ولا بعد 100 سنه من شكله – وان لقى .. أول حاجه هيعملها انه يسيب البنت دى .. كفايه فقر بقى
واحد ومراته - كبار فى السن – ماشيين على الكورنيش بياكلوا ترمس فى منتهى السعاده و الأمتنان و مش عايزين حاجه تانيه من الدنيا
واحد شكله تعبان طحن ومش لاقى ياكل ، بس جايب أحدث " أوبايل" و بيتكلم فيه بصوت عالى فى وسط الشارع .. عشان هو حر
واحد عمره ما شاف الزبده فى حياته ولا يعرف بتستخدم فى أيه أساساَ .. عاملين معاه لقاء فى القناه الثالثه بيسألوه عن رأيه فى مقاطعه المنتجات الدنماركيه .. قلهم " أه طبعاَ انا مع المقاطعه دا واجب وطنى يا جماعه أنتوا بتتكلموا إزاى؟
واحد واقف مع خطيبته/صحبته قدام قفص الأسود فى جنينه الحيوانات بيقولها : " بصى .. أهو ده بقى أسد !!" شاعراَ بأنه قد منحها العلم والمعرفه المطلقه واسرار الكون
بنات بكرش لابسه بديهات ستومك .. عشان دى الموضه
أسره مكونه من 4 أفراد أب وأم وبنت شابه وولد فى أعدادى قاعدين فى كافيه.. طلبوا عصاير وشيشتين .. مين اللى شرب الشيش ؟! .. البنت وأمها .. أه والله .. الموضوع ده حصل قدامى
مره كان فى ماتش للأهلى و فريق تانى مش فاكره .. كان فيه 2 منقبات بيشجعوا فى المدرجات !! .. و واحده منهم كانت لابسه نقاب أحمر .. تشجيع بقى .. صباح التهييس
جرب أنت كمان تعمل دماغ ناس .. هتلاقى الموضوع مسلّى جداَ
9 comments:
اشطة يا بوب واضح ان دماغك عالية اوي وانا برضه باحب اعمل دماغ ناس تصدق دي ويسلام لما الغزالة بتروق باخرابها على حق صباح الاشتغالات تعالي عندي وانت ها تتكيف يا باشا والله العظيم اخر دماغ كنت عاملها امبارح وانا متنيل مرمي في معهد القلب الناس والممرضين والدكاترة كله كان عاوز يقعد معايه في سريري مش هاطول عليك اقعد بالعافية
يوووووووووووه
روح مارينا و انت تعمل دماغ ناس هاى
:D
واحد واقف مع خطيبته/صحبته قدام قفص الأسود فى جنينه الحيوانات بيقولها : " بصى .. أهو ده بقى أسد !!" شاعراَ بأنه قد منحها العلم والمعرفه المطلقه واسرار الكون
---------------------
نسيت انها بتبقي فاتحه بقها شاغره فاهها من فرط صعوبه المعلومات التي يقولها لها
علي فكره انا كمان باعمل الدماغ الجامده دي بس جربها بقي في مترو الانفاق الجديد عالساعه ارعه او خمسه
انتوك
علي فكره انا لفيت عالمدونه كلها بعد ما علقت لقيتها لذيذه اوي بالذات قصه الملك اللي مات و الشعب الضريب بتاع قريه السعاده ده :)
انتوك
انا جاي احييك على الصورة
دي لوحها دماغ
برافو عليك
شوية دماغات عالية قوي
على فكرة دي هوايتي ..لما بالاقي فرصه
اني اقعدد ابص على الناس واعمل عليهم دماغ
وحشتيني يا مصر
المزاجانجي
صباحووووو
قشطة
احلي دماغ دماغ المزز صراحة
تبص علي كل المزز المعدية و تموت من الضحك
بيعملوا حاجات غريبة يا جدع
احنا مكناش بنات خالص
يلا مساؤه مانجة
دى اكتر حاجة بحب اعملها
بس مكنتش اعرف انها لها اسم و لها ولاد كار
و احلى دماغ بصراحة لما اتفرج على واحدة مش طايقة تصرفات جوزها او ام ابنها بيحرجها و يقولها عايز اللعبة دى و هى عاملة نفسها مش مركزة معاه و مجرد ما تلاقى ان محدش شايفها تزغده الزغدة اللى هى الولد يصرخ بعدها و تسحبه وراها كانها مش عارفة سبب عياطه
يلا باى علشان شكلى هعمل دماغ :)
عجبتني اوي حكاية ده اسد دي .. واية ده انت محدش قاللك ان الكرش موضة ده انا واصحابي شايفين الموضوع ده بقالنا كتير حتى بنفكر نربي واحد .. يا ابني الكرش موضة
هههههههههه
البوست ده من السنة اللى فاتت وانا لسة قارياه دلوقتى
عادى دونيا غرورة
اما بالنوسبة لموضوع دماغ ناس فدى اصبحت هواااية عندى .. اقعد اتفرج واتمحص وكل التعبيرات تبقى على وشى
مرة الاقى نفسى حزنت وهدمع خلاص
ومرة افطس من الضحك
ماهى دماغ بقا
Post a Comment