Thursday, October 05, 2006

رمضان إتسرق



رمضان إتسرق .. ايوه إتسرق .. انا مش لاقى رمضان

أنا مش بتكلم على العبادات والدين و الاخلاق .. لأ
رمضان إتسرق معنوياَ
رمضان ماكنش كده زمان .. أنا مش من زمان أوى

بس فيه حاجات كتير أوى اتغيرت الناس بقت بتمثل رمضان .. بقت " بتترمضن " !!م
كان زمان رمضان بسيط .. روحانى

كان زمان رمضان زينه .. ألوان .. فوانيس بسيطه .. عيال بتلعب فى الشارع.. وأغنيه "رمضان جانا" لعبد المطلب .. وبوجى وطمطم .. ومسحراتى .. وكنافه وقطايف .. وليالى الحلميه .. وناس بتزور بعضها وبتعزم على جيرانها .. وصوت محمد رفعت قبل الفطار .. كان فيه صوره جميله .. روح لرمضان

دلوقتى رمضان بقى تقليد .. بقى فوانيس صينى بتتكلم – الصين تعمل لنا فوانيس ليه ؟ .. ولا هما مسلمين .. ولا الفوانيس صعبه اوى كده !! – بقى إعلانات سمنه وزيت وموبيلات .. وبرامج سخيفه الناس بتضحك فيها بالعافيه .. ومسلسلات لناس بتحتضر

ناديه الجندى .. نبيله عبيد .. نور الشريف .. ورده .. ) من باب حسن الخاتمه )

بقى خيم رمضانيه .. خيم فطار وخيم سحور وشيشه وحلو الصمدى – صمدي يا صمديييي وحوى يا وحوييييي – وأى حد بيطلع يغنى أى حاجه عن رمضان :
"
رمضان يا حبيبى .. إشطه يا رمضان
رحمه وغفران .. رمضان رمضان
ياهلال رمضان .. أى بذنجان .. "

وبدل الزيارات بقت ميسدات والناس قاعده متيّسه قدام التليفزيون مسلوبه الأراده

كل حاجه راحت .. سرقوا رمضانيته و سابوا صوره مشوهه .. ملطخه بالألون
– كان زمان فيه صوره كده بتيجى فى المسلسلات لبنات صغيره فى الفلاحين حطين لها مكياج كتيير أوى عشان تبقى حلوه وتبان كبيره عشان يسننوها ويجوزوها – هى حاجه زى كده

بقى فيه تشوه عام فى صوره كل شئ .. الناس إتعولمت غلط .. خدنا من الغرب شكله وسيبنا العلم والتقدم .. خدنا سلع ومظاهر وفى المقابل سيبنا الحاجات اللى كانت مميزانا عنهم .. الدين .. الأخلاق .. العادات والتقاليد .. الطيبه والبساطه .. فقدنا هويتنا أو إتسرقت منا


خدوا الجلابيه و إدّونا بدى وعشان احنا طخان بطبعنا البدى طلع ضيق علينا فشكلنا بقى وحش فيه .. بقى مشوّه .. ومش لاقيين الجلابيه بتاعتنا ومش عارفيين نقلع البدى !!ا

3 comments:

شيمـــــاء said...

عندك حق
انا كنت فاكرة رمضان سرقوه من عندى بس

لكن خدت العجلة بتاعتى ولفيت لفة على المدونات لاقيت الناس كلها بتقول
امسك حرررررررررامى رمضا ن

saso said...

لا كدة تهييس بجد
انا كل ماندمج واكشر تضحكني ؟
:)
الناس بتترمضن .. لك حق
اتخاذ وضعية الصيام

زود بقي علي مسلسلات اللي بيحتضروا مسلسلات العائدات وياريتهم ما رجعوا بتاعة الوعظ والارشاد
والنبي لما الست سهير رمزي تديني درس في الاخلاق هافتكر انا اية غير افلام السبعينات اياها.. والمشكلة اني مش شايفاها من كتر الميك اب
حتي صابرين اتعدت وبقت تستعمل الوان مياه .. ما علينا
هنستمتع يعني هنستمتع
ده هوا رمضان واحد كل سنة

LAMIA MAHMOUD said...

رمضان ضاع
على من يجده الاتصال باي
0900