Friday, January 19, 2007

ستار اكاديمى .. تانى؟




بتشوف ستار أكاديمى ؟

لأ

يا رااااجل .. متكّسفش بس .. عادى .. كلنا بنشوفه ..ا

والله هو فى الأول كنت بشوفه من باب الفضول ، الفرجه على ناس جديده .. بس بعد كده إتعودت على الناس .. عارف .. ناس بتشوفهم كل يوم .. قاعدين .. واكلين .. شاربين .. نايمين .. مهيسيين .. لازم تتعود عليهم .. من باب العشره حتى .. ا

هى دى الفكره .. بيعودوك .. فكر إستعمارى بعيد المدى .. بيحتلوا دماغك .. شويه .. بشويه .. ويعودوك بعدها على حاجات ماكنتش هتقبلها أبداَ وأنت فى كامل قواك العقليه .. لأ وبيخلّوك كمان تحب اللى بيعمل الحاجات دى .. ا

حاجات أيه ؟! .. أيه يا عم نظريه المؤامره اللى أنت عايش فيها دى ؟! .. مش ناقص غير إنك تقولى إن إسرائيل هى اللى ورا البرنامج ده .. وحمله ضد الشباب المستهدف .. والكلام الخايب بتاع المسلسلات ده ا

إنت بتقول فيها .. ليه لأ ؟ .. مش بعيد .. البرنامج مربح و ناجح بشكل رهيب .. وهما أحسن ناس بتوع "ميديا" ا

أديك قلتها " ناجح بشكل رهيب " .. يبقى ايه بقى؟ ا

نجاح البرنامج لا يعنى نجاح المضمون أو نجاح الفكره .. والدليل على كده إن " محمد عطيه " خد مركز أول فيه !! ا

البرنامج معتمد على عده عناصر هى اللى أدت لنجاحه ومعظمها نقاط ضعف عندالناس : ا
ا
تفاهه معظم الشباب العربى .. معندوش هدف .. و من خلال المفهوم ده إستغل حاجتك فى التعبير عن رأيك وأقنعك ان صوتك ليه أهميه .. إن إنت بتشارك فى صناعه النجم اللى بتحبه من خلال التصويت ليه .. وبالتالى هو كسب من واحد جاهل و تافه زيك عشان حسسك بالأهميه أهميه صوتك .. ا

وبالفلوس دى عمل .. إنتاج ضخم و مبهر .. وده العنصر التانى اللى هو أساساَ نتيجه للعنصر الأول

رغبه الناس فى الشهره والنجوميه .. حتى لو ماكنتش مؤهل لها أو تستحقها .. ودى برضه نقطه ضعف بشرى بشكل عام .. عربى بشكل خاص .. لأن نظريه التواكل والواسطه متفشيه فى الشعوب العربيه بشكل عام .. فى الغرب .. الناجح بيوصل بمجهوده والعلم ليه مكانه عندهم .. عشان كده هما متقدمين .. أما عندنا .. فالتخلف مستشرى و فى تقدم مستمر لأن العرب نوعين ..ا

ناس صحيت لقت معاها فلوس مش عارفه تعمل بيها إيه وهما معندهمش علم ولا عايزين يفكروا يعملوا بيها أيه .. فأشتروا ناس يفكرولهم .. وناس يدافعوا عنهم .. وناس يسلّوهم .. كله بفلوسهم .. على رأى محمد صبحى فى مسرحيه تخاريف .. قال له: " إشتنيلى جزيرتين واحده كبيره و واحده صغيره .. وإشتنيلى كمان شوية لنشات عشان أبقى أروح الجزيره الصغيره اللى أنا مش طايقها أتف عليها و أرجع" .. ا

وناس تانيه مش معاها فلوس فبصّت للناس اللى معاهم وحقدوا عليهم عشان هما شايفين إنهم يستحقوا الفلوس دى أكتر منهم - نظريه التواكل برضه - وبالتالى كلهم بيكرهوا بعض ( بيحتقره لأنه مشغلّه بفلوسه أو بيحقد عليه لأنه ملقاش فلوس زيه ) .. ا

إن الموضوع لطيف .. غنا ورقص .. فى اللذيذ يعنى .. مش محتاج مجهود ولا وحده عربيه ولا وجع دماغ .. ا

طيب .. بس ده كله مافيهوش مشكله .. خلّيهم يفرحوا يا سيدى .. بجملة التفاهه .. أهم بيتسلّوا .. ا

أيوااااه .. المشكله بقى فى المحتوى اللى بيتقدم وخطورته فى إنك تتعود عليه .. تتعود على إنك تشوف بنات قاعده مع ولاد 24 ساعه بهدوم البيت .. بيلعبوا .. ويهزروا مع بعض بأيديهم .. ويحضنوا بعض .. ويبوسوا بعض .. عاااادى جداََ .. هيا دى الوحده العربيه !!ا

لأ ويحببوك فيهم كمان .. عشان خلاص .. إنت بتشوفهم كل يوم .. عايش معاهم .. بتنفعل بأنفعالتهم .. بتفرح لفرحهم .. وبتزعل لزعلهم .. هما فى الأخر ناس زيك زيهم .. شباب فى سنك .. تلاقى فيهم فتاه/فتى أحلامك و إنت خلاص بقى .. إتعودت إنك تشوفها مع ولاد تانيّن فى الأكادميه .. فعادى بقى .. تتعود تبقى (. . .) عادى برضه ا

وفى الوقت نفسه يأخد جزء من وقتك وإهتمامك .. بمتابعه التطورات المثيره فى البرنامج .. مين اللى خرج .. مين بيحب مين .. مين نومينيز الأسبوع ده .. فيلهيك عن إنك تفكر فى مشاكل ناس تانيه بتتضرب فى (فلسطين – العراق) .. يا عم فكك بقى .. مش طالبه غم .. ا

وتفضل تتعود وتتعود ويبقى " يور فيفوريت شو " وتصوت للى إنت بتحبه .. وهما يكسبوا .. والبلد يطلع فيها نجم جديد فى عالم الرقص والغناء .. ماهى ناقصه نجوم !! ا

11 comments:

Utopian said...

الله ينور علييييك
انت كده جبت الخلاصه فعلا

عارف ..انا كنت بقعد اتريق عليهم و علي كل اللي بيتفرج عليهم الموسمين اللي فاتو

الموسم ده..قعدت اتفرجت من باب الفضول
و شويه شويه بدأت دناغي تفسي لامؤاخذه و بدأت اتفاعل معاهم و اقول كلام اهبل

بس الحمد لله...لحفت الفيروس و حلفت منا شايفه تاني

حسيت اني بدأت ابقي....بالظبط

Poussycatmiu said...

Salam Alikom

افتكر ان البرامج دي مفيدا جدا جدا للمواطن العربي الغلبان ..و هية نتاج المؤتمرات الكتييييييييييييييييرة للقادة العرب..و كلها تنصب تحت مشروع

""" نجم ...مغني ...و راقصة لكل مواطن
عربي دماغه مهيسة"""

و طني حبيبي الوطن الأكبر ...يوم وارا يوم امجاده..عفوا.. حبيبي ما جاني نوم...
و السلام

محمد عبد الغفار said...

فعلاً هى دى تفاصيل المؤامرة

Memo said...

انا جت فتره كنت بتابعهم في الاول بس قرفت من الانحلال و الارف الي لا يمت بصله لينا كعرب
و للاسف النظره بتاعت الشياي وان دلت تدل على عدم موعي باهميه الوقت كويس انك فكرت في كده
تحياتشي

ihapoof said...

Thanx all 4 ur comments

w batalo forga bgad ;)

Ayat said...

والله معاك حق... أنا افترجت بس على آخر كام حلقة فى اول موسم لان اصلا ماكانش عندنا دش ساعتها .. و الشاب الحبوب اللى اسمه هانى ده .. كان بيشتغل معانا فى الشكرة وكانت البنات مبهدلة روحها عليه وهو كان لسه يادوب مودي اعلانات .. ورغم انى كنت مستهيفة فكرة انه يبقى بتاع اعلانات الا انى (...) بعد ماساب شغلانة محترمة وراح ستار اكاديمى .. المهم الشهرة و الحريم يابوب .. النغنغنة
ما علينا

Known as PHYSCO said...

الله ينور عليك ، اديك قلت السبب ، لى واحدة صاحبتى متابعاه من الموسم الأول .. و أنا أخيرا عرفت ان المحطة اتفحت عندنا فى الموسم الجديد .. واحدة صاحبتى تانية قالت لى ابقى افتحى و اتفرجى على حلقة واحدة بس و شوفى الهبل ، قلتلها ماشى بس خمس دقايق و الموضوع طار من بالى .. و حتى لما افتكرت ما حبتش أتفرج عليهم مش عارفة ليه ، اديك انت قلتى لى السبب ، لا يا عم خلينى قاعدة كده و لو عايزة أعرف اخبارهم أبقى اسأل صاحبتى ربنا يهديها

mohand said...

السلام عليكم

بيقولك لازم تفهم صح علشان تتصرف صح

انت عملت الصح
وصدقني مفيش الا الصح
انا عمري ما تبعتهم بس كنت بتفرج علي الموسم الاول من باب تقضية وقت بس معجبنيش اللي انت قولت عليه دا فعلا


علي فكره فكرة البرنامج دي قديمه وموجوده في امريكا واورباا عادي يعني

مهند المصري
الباحث عن الحقيقة

واحد من الناس::طارق:: said...

عجبنى اوى تحليلك لفكرة البرنامج واضراره ... وهى بالظبط زى ممانت قلت كدة ...الاعتياد
عمرى ماتفرجت على البرنامج دة ولا هاتفرج ..دة انا ببقى عاوز اجيب اللى فى بطنى لو وقفت على الفناة بتاعتهم بطريق الخطأ
ويا رب الناس تفهم بقى
تحياتى

mirage said...

ستار اكاديمي فعلا مشروع ضخم الانتاج بس بصراحة احنا مش محتاجين مفنين والحمدلله احنا ممكن نصدرهم اصلا
ده غير ان البرنامج تحول لعنصرية غريبة من كل دولة تجاة المشترك الي من عندها يعني بيصوتو لابن البلد مش للأفضل -زي ما بيقولو-
ولو نيجي نشوف الي طلعو من ستار اكاديمي عملو ايه في الساحة الفنية؟ ؟
ولا حاجة ...
برنامج زي قلته

Ganna Adel said...

الحمد لله و ليا الشرف و ربنا يديمها عليا نعمة (احسن الواحد مش ناقص حرق دم و صحتى بقت على قدى) ولا شفته ولا حتى فكرت و كل ما حد يسألنى بتشوفى ستار اكاديمى اقوله لأ الاقى نظرة اشمئناط عجيبة و كأنى مقصرة فى واجب قومى مثلا..